मेरा प्रेमका रङहरू
मेरा प्रेमका रङहरू
कोही मुलायम गुलावी छन्
ती गुलाफका पत्रजस्तै
सुन्दर-शालिन भएर फुल्दछन्
अनि झर्दछन्
कोही गाढा रातो छन्
ती सुन्दर ओठका आभाजस्तै
धपक्क बल्दछन्
विस्तारै, विस्तारै रङ्ग फेर्दै
रंगहरूकै चित्र कोर्दछन्
र आफ्नै गोरेटोमा हिँड्दछन्
मेरा प्रेमका रङहरू
कोही शितल नीलो लेपका छन्
ती समुन्द्रका किनार र
आकाशका सुस्केरामै बिलाउँछन्
कता हराउँछन्, कता हराउँछन्
स्मृतिमा रेखा कोर्दै
विस्मृतिमा विलिन हुन्छन्
कोही मन्द-मन्द पहेंला छन्
सबेरैको सूर्यजस्तै
भावना र आशा जगाउँछन्
दिन ढल्दै जाँदा
डाँडापारि अस्ताउँछन्
र भोलिपल्ट बिहानै उदाउँछन्
मेरा प्रेमका रङहरू
कोही शान्त हरियो वर्णका छन्
जङ्गलमा सुस्ताएका आँखाजस्तै
न्यानो-न्यानो भएर सलबलाउँछन्
कोही कति काला छन्
अँध्यारोमैं रमेर जम्न खोज्छन्
र पनि मिठास छोडेर भाग्दछन्
मेरा प्रेमका रङहरू
होलीका रङजस्तै
जीवनभर आउँछन्-जान्छन्
आउँछन्-जान्छन्
र पनि ती सदा मोहक लाग्दछन्
मेरा प्रेमका रङहरू…!
प्रतिक्रिया दिनुहोस्
