निरन्तर यात्रामा 
यात्री बनेर बाटो हिँडिरहँदा 
बटुवा हजार हुन्छन् बाटो बाटोमा
अनेक मोड घुम्तीहरू पार गर्दैगर्दा 
दोबाटो र चौबाटोमा बाटो छुट्टिँदै जान्छ 
मोड र घुम्ती अनुसार 
यात्री मोँडिदै जान्छन् 

हरेक चौबाटो र दोबाटोमा
एउटा छोडिन्छ, अर्को भेटिन्छ 
अर्को छोडिँदा अर्कै भेटिन्छ 
बाटो एउटै लक्ष्य बेग्लाबेग्लै 
बेग्लै लक्ष्य दोबाटो र चौबाटोमा छोडिन्छ

घुम्ती र मोडमा बाटो मोडिँदा
हरेक बिसौनीमा मारिएका थकानहरू
चौबाटो, दोबाटो, मोड, घुम्ती, बटुवा  
सम्झना बनिरहन्छन् याद बनेर

बाटोको अन्तिम बिन्दु नपुगेसम्म 
लक्ष्य समात्नु छ
उदेश्य पूरा गर्नु छ, 
घुम्ती र मोड अनुसार 
कोही दोबाटोमा छुट्टिए, कोही चौबाटोमा
मृत्यु अगाडि नै पाइला टेक्नु छ शिखरमा

यात्रा पूरा नभएसम्म
यात्री बनेर हिँडिरहँदा
यात्रा निरन्तर चलिरहन्छ
हरेक नयाँ दिनमा, 
नयाँ बाटोसँगै नयाँ उमंग बोकेर।।