अन्तर्राष्ट्रिय

पाकिस्तानमा निर्वाचन अघिल्लो दिन आतंकवादी हमला, २८ को मृत्यु

पाकिस्तानमा आम निर्वाचनअघि भएको बिस्फोटमा परी २८ जनाको मृत्यु भएको छ। 

बलुचिस्तानको पिसिन र किला सैफुल्लाहमा बुधबार भएको विस्फोटमा कम्तिमा २८ जनाको मृत्यु भएको तथा ४० जना भन्दाबढी घाइते भएका हुन्।

पाकिस्तानमा आमनिर्वाचन हुन लागेको एक दिनअगाडि यो घटना भएको हो। पाकिस्तानमा आज आम निर्वाचन हुँदैछ।

पाकिस्तानले भर्खरै आतंकवादमा वृद्धि भएको देखेको छ, विशेष गरी खैबर पख्तुनख्वा र बलुचिस्तानमा सुरक्षा चिन्ताहरू बढाउँदै ६ लाख ५० हजार भन्दा बढी सुरक्षाकर्मी आजको निर्वाचनका लागि खटाइएको छ।

पहिलो बिष्फोट क्वेटाबाट एक घण्टाको दुरीमा रहेको पिसिनको खानोजई युनियन काउन्सिलमा हिजो दिउँसो केहीबेरमा भएको डान न्युजले जनाएको छ। 

जिल्लाका उपायुक्त जुम्मादाद मन्डोखाइलले डन डट कमलाई भनेका छन् कि, ‘पिसिन- १ बाट निर्वाचनमा उम्मेदवार रहेका स्वतन्त्र उम्मेदवार अस्फन्द्यार कक्कडको निर्वाचन कार्यालय बाहिर उक्त घटना भएको हो।’

उनका अनुसार १४ शव र २३ घाइतेलाई तहसील सदरमुकाम अस्पताल लगिएको छ। मेडिकल सुपरीटेन्डेन्ट डा हबिब काकरले चार जना घाइतेको मृत्यु भएपछि मृत्यु हुनेको संख्या १८ पुगेको बताए।

उक्त क्षेत्रमा पार्किङ गरी राखिएको मोटरसाइकलमा बिस्फोटक पदार्थ राखिएको डिसी मण्डोखाइलले बताए। प्रहरी, बम डिस्पोजल टोली र अन्य कानुन प्रवर्तन एजेन्सीहरूले तुरुन्तै क्षेत्रलाई घेरा हालेर प्रमाण सङ्कलन गर्न थालेका थिए।

दोस्रो विष्फोट केही समयपछि किला सैफुल्लाहमा भएको बताइएको छ। जमियत उलेमा ए इस्लाम फजलको निर्वाचन कार्यालय बाहिर भएको उक्त घटनामा १२ जनाको ज्यान गएको र २० जना घाइते भएको उपायुक्त यासिर बजाइले बताए।

बाजाइले पछि मृत्यु हुनेको संख्या १० मा परिमार्जन गरेका छन्, उनका अनुसार गम्भीर व्यक्तिहरूलाई हेलिकप्टरमार्फत क्वेटा सारिएको थियो।

प्रकाशित मिति: बिहीबार, माघ २५, २०८०

प्रतिक्रिया दिनुहोस्

थप समाचार