तीनकुने हत्या प्रकरण : एसएसपीको नेतृत्वमा पाँच सदस्यीय अनुसन्धान समिति गठन
तीनकुनेमा भएको चार जनाको सामूहिक हत्याबारे अनुसन्धान समिति गठन भएको छ।
काठमाडौं उपत्यका प्रहरी कार्यालय रानीपोखरीका एआइजी दीपक थापाले पाँच सदस्यीय समिति गठन गरेका हुन्।
समितिको संयोजक काठमाडौं उपत्यका अपराध अनुसन्धान कार्यालयका प्रमुख एसएसपी सोमेन्द्रसिंह राठौर रहेका छन्।
यस्तै, सदस्यमा जिल्ला प्रहरी परिसरका डिएसपी हरि खतिवडा, काठमाडौं उपत्यका प्रहरी कार्यालयका डिएसपी सुवास खड्का, काठमाडौं उपत्यका अपराध अनुसन्धान कार्यालयकी डिएसपी सुरक्षा केसी र नयाँ बानेश्वर वृत्तका इन्स्पेक्टर वीरेन्द्र केसी रहेका छन्।
उनीहरूलाई घटनाबारे अनुसन्धानका विविध विधि र प्रविधिलगायतको अधिकतम् प्रयोग गरी यथाशीघ्र प्रतिवेदन पेश गर्न निर्देशन दिइएको छ।
शुक्रबार राति काठमाडौं-३२ तीनकुनेको दिव्य काठ मिलभित्रको टहरोमा चार जनाको सामूहिक हत्या भएको थियो।
हत्यामा शंकास्पद रहेको आरोपमा प्रहरीले सोही मिलमा बस्ने धनकुटा घर भई तीनकुने बस्ने २८ वर्षीय दीपेन्द्र राईलाई पक्राउ गरेको छ।
प्रारम्भिक अनुसन्धानमा उनी त्यहाँ एक-डेढ वर्षदेखि आउने-जाने गरेको देखिएको छ।
शुक्रबार राति दोलखा घर भई सोही काठ मिलमा गेटपालेको काम गर्ने ५५ वर्षीय कुमार भुजेल, उनकी श्रीमती अम्बिका भुजेल, उनकी आमा ७० वर्षीया शुभद्रा भुजेल भुजेल र मोरङ बेलबारी घर भएका १९ वर्षीय नवीन राईको शुक्रबार राति हत्या भएको थियो।
उक्त स:मिल दोलखा कालिञ्चोक गाउँपालिका-८ घर भई गौशाला बस्ने बालकृष्ण शिवाकोटीले सञ्चालन गरिरहेका थिए।
हत्या भएकामध्ये ५५ वर्षीय कुमार त्यो काठमिलको गेटपालको रूपमा काम गर्थे। काठ मिलभित्र काठले बनाएको एक तले टहरोमा चारै जनाको हत्या भएको हो।
प्रतिक्रिया दिनुहोस्
थप समाचार
